Kriteria for tildeling av prisen er at arbeidet representerer spanande, utradisjonelle, framtidsretta og/eller offensive tiltak som er gjort innan kultur-, kunnskaps- eller informasjonsformidling, marknadsføring, lesestimulering, tilrettelegging av tenesta for ulike brukargrupper eller god teneste og service.
Også personar utanfor bibliotekmiljøet, som har gjort ein innsats for biblioteket, kan få prisen.

 Prisen kan gå til eit bibliotek, ein institusjon eller ein person i Sogn og Fjordane, og vert vert tildelt for framifrå arbeid i biblioteka eller arbeid for å fremje og synleggjere biblioteka og biblioteka si rolle i samfunnet.

I juryen har flg. vore med: Anja Angelskår Mjelde frå fylkesbiblioteket. Frå NBF har Siri Ingvaldsen og Gerd Vik.

Fleire sterke kandidatar har vore foreslått. Det kom inn 5 framlegg og fristen for forslag gjekk ut 15.juni.

Her er talen som vart halden av Gerd Vik under overrekkinga av prisen som var eit grafisk trykk av Hans Normann Dahl: Den blå hesten. Prisen er støtta av Skald og Selja forlag, i tillegg til Sogn og Fjordane fylkesbibliotek.

Årets bibliotekpris for Sogn og Fjordane går til eit bibliotek:

            Gloppen folkebibliotek

Juryen si grunngjeving:

”Biblioteket er både folkebibliotek for Gloppen kommune og skulebibliotek for Firda vidaregåande skule. Som kombinasjonsbibliotek har dei tilsette store utfordringar i å sy saman og synleggjera tilbod til mange ulike brukargrupper. Biblioteket har på ein ypparleg måte balansert tilbodet slik at det når unge og eldre, skuleelevar og folkebibliotekbrukarar.

Biblioteksjef Torill Berge framstår som ein entusiastisk og inkluderande biblioteksjef som er open for nytenking, og dette viser att i drifta av biblioteket.”

Kommentar:

Ei grundig og god bibliotekteneste har dei: Gode heimesider med interaktivitet (td meg & mitt-teneste) med god nynorsk språkbruk og aktualitetar og nyhende. Biblioteket tilbyr frå i år det ”nasjonale lånekortet” som forenklar kvardagen for brukarane.

Tilboda på biblioteket femnar om skjønn- og faglitteratur, filmar, lydbøker, Internett-tilbod, arrangement og bokkafe. Dei har eit høgt utlån – over 7 utlån pr innbyggjar i 2005 (Ikkje det høgste i fylket men likevel godt over snittet som var på ca 5 utlån pr innb.)

Lesestimuleringstiltak driv biblioteket aktivt med – personalet har skulert seg gjennom bokpratkurs og driv svært aktivt med klassebesøk.

Ei viktig grunngjeving for juryen har vore den utradisjonelle kulturformidlinga som karakteriserer Gloppen folkebibliotek. Nokre viktige punkt her er:

·          Filialen på Byrkjelo – starta bokkafe for eldre, med transportordning til dei som treng det. Dette populære tiltaket har dei halde på med i 5 år no.

·          Feiringa av 165 (!) årsjubileet i 2005 foregjekk ei veke til endes med arrangement og aktivitetar retta mot ulike brukargrupper, men også mot bibliotekmiljøet i fylket.  At biblioteket i si tid (1990) fekk skrive si eiga historie vitnar om eit bibliotek med stolte tradisjonar. 165 år var rundt nok for ei skikkeleg feiring!

Juryen har også lagt vekt på at samarbeid og dialog er viktig for biblioteket.

·          Dei samarbeider breitt på kultursektoren rundt Fjordhesten som kulturberar. Her har tilsette ved biblioteket også vore med på prosjektutviklinga.

·          Samarbeidet med Sanitetslaget om bokkafeen er eit anna døme på utradisjonelt samarbeid.

·          I 2005 vart det oppretta eit bibliotekutval - eit samarbeidsutval mellom biblioteket og Firda vidaregåande skule - for å kunne arbeide meir strukturert og målretta om bruken av biblioteket som læringsarena i skulen. Dette er eit tiltak som også vil fremje dialog og samarbeid mellom biblioteket og skulen.

Trass i at også Gloppen folkebibliotek er råka av nedskjeringar dei seinare åra (det medførte m.a. innskrenka opningstider frå 2005) har personalet stått på og jobba iherdig og klart å halde aktiviteten på eit stabilt høgt nivå.

Så er det også nokre entusiastar som driv bibliotektenesta i Gloppen kommune. Biblioteksjef Torill Berge er ei av dei. Ho har reflekterte haldningar til drift av bibliotektenesta. Dette gjenspeglar seg både på nettsidene deira og også td. i årsmeldinga frå 2005 der biblioteketsjefen skriv:

” Utfordringa er å vera eit bibliotek i tida. Lokale bibliotek har ei viktig rolle i høve til demokratisering og deltaking. Møteplassfunksjonen er vesentleg og fokus på brukarane må stå i sentrum, dermed er tilbod og tilgjenglighet sentralt. No er det vedteke at det blir Trivselshage med nytt bibliotek, noko vi er sikker på vil bli til glede og nytte, og som vil gje biblioteket plass og rom til nysgjerrighet og oppleving, - inn i nye tider.”

Eg kikka litt på heimesidene for biblioteket og der fann eg under ”glimt frå utlånsstatistikken” at det var tidsskriftet ”I form” som var mest utlånt i 2005.  Me vil med denne prisen understreke at Gloppen folkebibliotek også er eit bibliotek i særdeles god form!

Med Trivselshagen og nye funksjonelle lokale i sikte -  håper me at denne prisen og dette bildet kan bli med inn i framtida til det nye Gloppen folkebibliotek. Og at prisen kan vera med på å halde entusiasmen og pågangsmotet hjå bibliotekpersonalet oppe!

Heimesida til Gloppen bibliotek