Tekst: Anders Ericson

Publisert 13.12.2007

Nåmdal, som er biblioteksjef i Modalen, er overvelda over støtta frå bibliotekbrukarar flest og frå kunstnarar og fagfolk, og over interessa frå presse og kringkasting:

	Inga Jorunn Nåmdal og NBF Hordaland kan sjå tilbake på  ein godt utført jobb. Foto: Lena J. Glesnes

- Eg trudde nesten ikkje mine eigne auge då Kommunal Rapport trykte ein reportasje over heile tre sider frå ein tur med båten og om trugsmålet om nedlegging. Dei skriv jo nesten aldri om bibliotek (noko som kan bli betre om dei oftare blir tipsa!, journ. merkn.).

- Det var styret i NBF Hordaland som drog kampen igang?

- Vi skreiv ei pressemelding fredag 23. november og baud pressa å vitje Epos og mannskapet måndagen etter, då ho låg ein time i Bergen. Dette gav spontan respons, og så berre auka det på. Men tilbodet er jo over førti år gamalt og svært godt kjent over heile Vestlandet.

Eg har sjølv jobba ombord ein periode. Vi hadde eit stopp i Modalen også, men etter at biblioteket flytta heilt ned på brygga, kutta vi det ut. Tilbodet er likevel billeg for kommunane, og dei får jo mykje meir enn bokutlån. Kulturtilbodet er heilt vesentleg i dette.

For dei stadene som framleis er veglause er dette ekstra viktig, og dei er det framleis ein del av. Ein fordel med bokbåten er fleksibiliteten; det er enkelt både å leggje ned og opprette nye stoppestader.

	Kommunal Rapport hadde bokbåten både på framsida og over tre sider inne i bladet

- Det er berre to år sidan det same skjedde i Sogn og Fjordane, men også den gongen med siger for bokbåtentusiastane. At det skjedde no igjen, kan det ha med valet og mange ferske politikarar å gjere?

- Kan hende det, det kom i alle fall utruleg brått. Ein del politikarar er nye, men fylkesordføraren er den same. Likevel trur eg denne prosessen gjer at dei vil tenkje seg om og passe seg i framtida. Og eg trur dette har vore god reklame for biblioteka generelt. Så spesiell er ikkje bokbåten, avsluttar Inga Jorunn Nåmdal.

Over 1200 skreiv under oppropet til forsvar for bokbåten, og p.t. er 795 medlem av Facebook-gruppa til støtte for Epos.

Sjå også oppføringa av Epos-kampen i Hordaland på wikien BibliotekSATS og avdelinga for «Seierrike bibliotekkamper».